Temperaturat ekstreme që kanë përfshirë vendin po rrezikojnë shëndetin e punëtorëve, ndërsa masat e rekomanduara nga Ministria e Shëndetësisë nuk po zbatohen në terren.

Kështu ka deklaruar Jusuf Azemi, kryetar i Sindikatës së Pavarur të Sektorit Privat. Inspektorati i Punës tha se i ka inspektorët në terren për zbatim të këtyre masave.

Përkundër temperaturave ekstreme që po mbretërojnë ditëve të fundit, masat e rekomanduara nga Ministria e Shëndetësisë për mbrojtjen e punëtorëve në sektorin privat nuk po zbatohen në praktikë.

Kështu ka deklaruar kryetari i Sindikatës së Pavarur të Sektorit Privat të Kosovës, Jusuf Azemi, për Radio Kosovën i cili tha se tash e tri ditë ka parë vetë punëtorë që po vazhdojnë të punojnë në ambiente të hapura edhe gjatë orëve më të nxehta të ditës.

“Në pikun e vapës, puna po zhvillohet sikur të mos ekzistonte asnjë vendim. Dje, një punëtor ka humbur jetën si pasojë e sulmit kardiak nga temperaturat e larta, kjo tregon se as nuk po hyn në punë ky vendim”, tha ai.

Ndërkohë ministri në detyrë, Hekuran Murati, ka folur për vdekjet e punëtorëve në vendin e punës. Ai theksoi nevojën për masa edhe nga punëdhënësit edhe nga investitorët.

“Vitin e kaluar ka qenë numër rekord i ulët i vdekjeve në vendin e punës, uroj që këtë vit të mos kemi raste të tilla tragjike. Duhet të merren masa edhe nga punëdhënësit edhe nga investitorët”, tha ai.

Për zbatimin e vendimit të Ministrisë së Shëndetësisë përgjegjës është Inspektorati i Punës. Ushtruesi i detyrës së kryeinspektorit, Riza Plakolli, tha për Radio Kosovën se inspektorët janë duke monitoruar zbatimin e vendimit në terren.

“Orari i punës i përcaktuar nga ora 11 deri në orën 16 po respektohet nëpër të gjitha vendpunishtet e inspektuara. Gjithashtu deri në këtë moment Inspektorati Qendror i Punës nuk ka pranuar asnjë ankesë zyrtare që lidhet me moszbatimin e këtij vendimi”, tha ai.

Plakolli tha se në gjithë rajonin e Prishtinës janë vetëm 20 inspektorë.

Përveç masave për punëtorët, edhe Ministria e Mjedisit, Planifikimit Hapësinor dhe Infrastrukturës ka ndërmarrë veprime. Nga 23 deri më 28 korrik, është ndaluar qarkullimi i automjeteve me peshë mbi 15 tonë në autoudhë, rrugë nacionale dhe rajonale nga ora 11:00 deri në 17:00.